സംസ്ഥാനത്തെ അനധികൃത ഖനനം തടയണമെന്നാവശ്യപ്പെട്ട് കെപിസിസി പ്രസിഡന്റ് വി എം സുധീരന്‍ വനംമന്ത്രി തിരുവഞ്ചൂര്‍ രാധാകൃഷ്ണന് കത്ത് നല്‍കി. അനധികൃതമായി നല്‍കിയ ഖനനാനുമതികളെക്കുറിച്ച് അന്വേഷണം വേണമെന്നും കത്തില്‍ ആവശ്യപ്പെട്ടിട്ടുണ്ട്. ക്വാറികളുള്‍പ്പെടെ ഖനനത്തിന് തോന്നിയതുപോലെ അനുമതി നല്‍കുന്നതായി വ്യാപക ആരോപണങ്ങള്‍ ഉയര്‍ന്നിരുന്നു. പരിസ്ഥിതി കമ്മിറ്റിക്ക് അദ്ധ്യക്ഷനില്ലാത്ത കാലത്ത് നിരവധി സ്ഥാപനങ്ങള്‍ക്ക് ഖനനാനുമതി നല്‍കിയിരുന്നു. ഇത്തരം നടപടികളെക്കുറിച്ച് അന്വേഷിക്കാന്‍ പ്രത്യേക സംഘത്തെ നിയോഗിക്കണമെന്നും കത്തില്‍ ആവശ്യപ്പെട്ടിട്ടുണ്ട്.
